2023-10-13 20:46:42
IMALA KEE DURSII KANA HUBADHU!
❍ #Namni maal naan jedhaa?'n waan namni siin jedhu jijjiiree hin argamu; garuu eenyummaan kee gooftaa waan siin jedhamuuti. Kanaaf ofitti amanummaa kee gabbisii qabadhu! Akka siin jedhan ta'uuf osoo hin taane, akka taatee argamtu akka jedhamtuuf hojjedhu! Hamma geessus hin ibsin; hammi geessu suniyyuu ragaadha. Hundaaf gurra ergisuunis gurra kaayyoo ofiitti dugda gatuu akka ta'e yaadaan qabadhuu deemsa itti fufi!
» Imala milkii!
❍ Gaafa sochii eegaltu sirrattis sochiitu eegalama. Waa'een kee karaa lamaan odeeffamuu itti fufa. Kaan sababa malee si jibba, sirratti odeessa, maqaa kee faalee dhiisuu dida, dhagaa filee sitti darbata. Kaan immoo ofitti si waama, harka walitti siif rukuta, dibbee siif reeba! Eeyyeen kanatu jira! Kun jiraachuu isaa hubachuu fi kanaaf deebii akkamii akka laattus of harkaa qabaachuutu si ceesisa.
❍ Kan akka hin taaneen si hordofu hin hordofin! "Jaldeessa faana dha'uun hallayyaa nama buusa!" jedha Oromoon yeroo mammaaku. Kan sitti wacu gargaartee sagalee wacaa ol kaasuun, gurra gara kaayyoo keetii hin butuchiin, dhagaa sitti darbamuu walitti qabii riqicha ce'umsaa fi mana galmaa ittiin ijaarratta, jechoota si hin ilaalle sitti maxxanan immoo akka dubbii waa'ee hin baafnee fi balfa gatamaatti fageenyatti ofirraa eegi!
⩩ Akkasuma, kan si faarsu faana of hin faarsin; gaafa si arrabsu faana of arrabsuu malta. Sagalee weedduu iddoo siif hin malletti miirri siif kennu dhageessee weedduu fi gonfoo gaara mo'ichaa irraa akka hin hafnetti of eegi! Badhaasa siif kennamu adda baasii beeki! Badhaasni fi jajjabeessi siif hin malle itti quufinsa sobaa si gonfachiisuun karaa jal'aa irra si qajeelcha. Eeyyeen, kan siif laatu kennaa isaa dura, eenyummaa isaa adda baasi! Hubataa ta'i!
⩩ Kan siif jibbu jaalattee, kan si jibbu hin jibbin! Kan siif reebu ol kaastee, kan si reebu reebuuf yeroo fi anniisaa kee hin gubin! Kana hundumaa, akka galumsaatti, keessumeessuu akka dandeessuuf ogummaa dabaladhu!
Via leadership. @segnigudeta
15.8K viewsSanyii Guddataa, edited 17:46