ردّ يا ابو صوت الدافي خويه الهجر ما كافي ..................... | قناه الشاعر علاء المياحي
ردّ يا ابو صوت الدافي
خويه الهجر ما كافي
............................................
وأخيرآ راح اشوفك سنه احلم كون يمك*
هاك حضني وفكلي جرحك وانه اوعدك ما الچمك*
وبجنازتي..اچفي الهجر.. كافي انتظر..طال العمر*
يا جنتي..بيك انه اطب.. ذاب الگلب.. من الغرب*
مشتاگه خويه الحچي اعيونك*
اترس حياتي بياض ابلونك*
رجّعلي خدري الراح ابدونك*
حسين........حسين
بشاطي حنانك ردّ واشتلني*
شام الغرب صبخه وعذبني*
الوادم غريبه شگد سمتني*
حسين.........حسين
مشتاگه اشوف اعيونك
شلي بحياتي ابدونك
..........................
يبست احزاني وانته ما جيت موسم الغربه حصدني*
يا قراري اشكثر تانيت خيرك ايبللي متني*
موسم عطش..بعدك بده.. لمّن حده.. بضعني العده*
بليل اهدعش..ليليه اعد.. واحسب ترد.. تسگي الورد*
باگت جمالك ذيچ الصحرى*
وباگت حياتي الغربه المره*
درب الهجر طوّل شيعبره*
حسين.......حسين
جرفك نشف واعيوني تعطشه*
تراب الخرابه ابدمعي ارشه*
صيت الوداع ابعمري اطشه*
حسين......حسين
عطشانه اسمع صوتك
واتنعم امن امروتك
............................
كلهه گالت ما يردلچ وانه اگولن هسه يرجع*
المطر يرجع يم شتاله ومن براده وفيضه يشبع*
وابسچته..افرش حلم.. وانثر نجم.. بچفوفه اشم*
ويم خطوته..اسجد جرح.. لفه الصبح.. شابع ذبح*
اسمك رسالة شوگ اقراها*
ضي الگمر اشعر غطاها*
يا جرحي بس بيك انه اتباها*
حسين......حسين
آلامي بيك احسبهه مريحه*
فراگك سهم وايامي ذبيحه*
متون العمر يا خويه جريحه*
حسين.......حسين
امن احزانك اترس يومي
بعدك عشت بهمومي
.............................
انته أول نبي للشوگ مرسل ونظراته وحيه*
مختزل كلشي ابحنانه وانچفه اعله الگاع ضیه*
وايرتله..بعيني الدمع.. أيه ويشع.. من انوجع*
واركض اله..وبجروحه احس.. چنهن امس.. وابچي ابهمس*
كافي عذاب ارجعلي دخيلك*
باب الگبر افتحلي واجيلك*
موتي گرب خليني امشيلك*
حسين......حسين
العايش بعيد اتذبحه الغربه*
سهم الفراگ ايعذب گلبه*
طولي نبي والشام اتصلبه*
حسين.......حسين
الشام اشكثر اذاني
حارمني من اخواني
.............................
وارجعت تاخذ رقيه من حزنهه اشمعنه أنه*
ظلمه عمري وانته وهجك تارس الدنيه ابحنانه*
كون التقي..انه وهلك.. اوصل الك.. اتوسلك*
وياك ارتقي..يم فاطمه.. فوگ السمه.. وانسه الضمه*
نحچي سوالفنه الما خلصت*
براگ الخيم يا خويه انذبحت*
عيوني اعله شوف اعيونك عطشت*
حسين......حسين
ألشام وجرح الطف كون انسه*
خدري يرد عباس ايحرسه*
ارجع واخذني وياكم هسه*
حسين......حسين
ارجع واعيش اوياكم
بلمتكم اشمحلاكم
علاء المياحي
الفاتحه لروح والدي