2023-05-04 08:19:39
“Yalang‘och iqtisodiyot” kitobi haqida ko‘p post qildilar shekilli, nima uchun bu kitobni buncha piar qilyapsan deyishdiganlar koʻpaydi.
Bugun aynan nima uchun shu kitobni ko‘proq o‘qishlarini xohlashimni tushuntirib beraman. Atrofda ko‘pchilik, hatto iqtisodiyot sohasida diplomi borlar ham iqtisodiyotning oddiy qonunlarini tushunishmaydi. Buning ortidan turli xil muammolar kelib chiqaveradi.
Valyutalar kursi qanday shakllanadi, mahsulotlarning narxi nimaga oshadi yoki tushadi, nima uchun bank hammaga kredit berolmaydi, nima uchun bitta qaror bilan maoshlarni oshirish imkonsiz, shu kabi savollar atrofda ko‘p aylanadi. Ularning atrofida iqtisodiyotni tushunmagan insonlar afsonalar to‘qishadi, rivoyat o‘qishadi, konspirologiya yanada ko‘payadi.
Ko‘pchilikka iqtisodiyotni o‘rganishni tavsiya qilamiz, lekin afsuski iqtisodiyot haqidagi kitoblar murakkab tilda yozilgan va ularni shunchaki tushunib olish oson emas. “Yalang‘och iqtisodiyot” kitobida bo‘lsa hammasi sodda tilda, o‘ziga xos hazillar bilan tushuntirilgan. Uni o‘qigan odamga iqtisod yomg‘irdan keyingi ochiq osmon kabi tiniq ko‘rinib boshlaydi.
Mana shuni his qilganim, iqtisodiy asosli bilim hozir jamiyatimizga qanchalik kerakli ekanligini anglaganim uchun ham bu kitobni tavsiya qilishdan charchamayapman. Agar qo‘limda bo‘lganida, avvalo bu kitobni iqtisodiyot sohasidagi barcha oliy ta’lim yurtlariga darslik sifatida kiritardim. Lekin, afsuski qo‘limda emas.
Xullas, siz bizning har kunlik, har daqiqalik hayotimizga ta’sir qiladigan iqtisodiyotni tushunishni xohlasangiz, shu kitobni o‘qing, keyin menga rahmat aytasiz.
246 views05:19