يا علي اتذوق هواك اشما احس خنگه* روحي ابين وحشه اختارتك رفگه | قناه الشاعر علاء المياحي

يا علي


اتذوق هواك اشما احس خنگه*
روحي ابين وحشه اختارتك رفگه*
واستشعر وجودك تارس الدنيه*
حتى الجرح بيك ايعّزب ابملگه*

انه ابين روحي وروحي اشتلنك*
والتذّ بالعطش لو دوم اعطشنك*
اسمك بيه حلا اعله الساني من احچيه*
علي بيقضه وحلم تلگاني اندهنّك*

بجرحك واهسي امعلگ*
يردّ اجديد من يعتگ*
اريد احچيهه طگ ابطگ*
عبوديتك يحيدر حگ*
............................
هدوء وجاذبيه ابحبك استشعر*
سجين ابعشگك وما اريد اصيرن حرّ*
عبدك كون اضلن واخدم اولادك*
الما ضايگ حلاتك بالعشگ يكفر*

قتّال العرب صح يا علي اسمك*
شي من سيفك وشي من عشگ رسمك*
كاتلني الغرام وداعت اعيونك*
انه ابكل نفس يا حيدر اشتمك*

اهوى اليخدمك حيدر*
همت ابخادمك قنبر*
هنياله الالك يسهر*
ويتچوى ابهواك اكثر*
............................
الحب المو الك يا ابو الحسن كفره*
الما يهوى علي چا شله بيه عمره*
ابو كل البشر خالقنه والخيمه*
الله وبس محمد يگدر ايفسره*

هوّه الرد شمسنه وسجدت الصبعه*
أليصوره بشر چا عقله شيقنعه*
شلون وما احبه واصرخ ابعشگه*
فدوه الدنيه كلهه النعله والشسعه*

جمر حبك ولا يهفت*
انته التحيي واتموت*
عقول الضدنه خلهه اتشت*
وكلمة (خالق) ادري اتفت*
.............................
باچر كلهه يمك تركع وتسجد*
وانته ابكيفك اتحلهه وترد تعگد*
وانه العاگد اگليبي ابفرض حبك*
مديون وهواك الربي عني ايسد*

يبو گلب الحنين وروحي عاشگتك*
بعيون الگلب يا ابو الحسن شفتك*
اريدك وارد اموت ابحبك العذري*
ردني الحضنك وخليني اطب بختك*

وبلّل بالعطف عمري*
يالجرحك كسر ظهري*
مصيري ولهفتي وقدري*
بيدك سلمت امري*
...............................
مناره ومن ضوه اعيونك صرت اندل*
مخربط عمري بس من شفتك اتعدل*
يواهب رحمتك للعالم وعطفك*
لوما لطفك انته الدنيه تتبهذل*

وجودك يا علي يستاهل السجده*
يواحد بس نعيمك ياهو اليعده*
شكرآ لله زارع حب علي بگلبي*
عطفه بيا مدامع نگدر انرده*

طارش ارسل الدمعه*
الحيدر احترگ شمعه*
اليسوه السجده والركعه*
ربي احسبني من ربعه*


علاء المياحي
الفاتحه لروح والدي