2023-05-05 06:01:33
Hafta Zaburi
Zabur 85
Dovud ibodati.
1 Tinglagin, ey Egam, javob ber menga,
Men muhtoj hamda yoʻqsilman.
2 Taqvodorman, jonimni asragin,
Senga umid qilaman, men, qulingni qutqargin.
Sen mening Xudoyimsan.
3 Shafqat qilgin menga, ey Rabbiy,
Kun boʻyi Senga iltijo qilmoqdaman.
4 Men, qulingga shodlik baxsh etgin,
Ey Rabbiy, men Senga yuragimni ochaman.
5 Sen, ey Rabbiy, yaxshisan, kechirimlisan,
Senga iltijo qilganlarga
Sodiq sevgingni koʻrsatasan.
6 Ibodatimga quloq sol, ey Egam,
Shafqat soʻrab qilgan iltijoimga diqqat qil.
7 Ogʻir kunda Senga iltijo qilaman,
Iltijolarimga Sen javob berasan.
8 Ey Rabbiy, xudolar orasida
Hech qaysisi Senga oʻxshamaydi,
Bironta buyuk ishni Seniki bilan qiyoslab boʻlmaydi.
9 Jamiki xalqlarni Sen yaratgansan,
Ey Rabbiy, ular kelib, Senga taʼzim qiladi,
Nomingga shuhrat keltiradi.
10 Zero, Sen buyuksan, moʻjizalar koʻrsatasan,
Sen tanho Xudosan.
11 Yoʻlingni menga koʻrsat, ey Egam,
Toki toʻgʻri soʻqmoqlaringdan yuray,
Menga sobit qalb bergin,
Men Sendan qoʻrqayin.
12 Ey Rabbim Xudo, butun yuragim ila
Senga shukur aytaman!
To abad Sening nomingni ulugʻlayman.
13 Menga boʻlgan sodiq sevging gʻoyat buyukdir,
Oʻliklar diyoridan jonimni qutqargansan.
14 Ey Xudo, takabburlar menga hujum qilmoqda,
Zoʻravonlar toʻdasi jonim payiga tushgan.
Ular Senga aslo eʼtibor bermaydi.
15 Sen, ey Rabbiy, rahmdil va inoyatli,
Jahli tez chiqmaydigan Xudosan,
Sevging va sadoqating moʻldir.
16 Holimga boq, mehr–shafqat qil,
Men qulingman, Oʻz choʻringning oʻgʻliman.
Menga qudratingdan ato qil,
Meni qutqargin.
17 Marhamating alomatini menga koʻrsatgin,
Toki gʻanimlarim buni koʻrib, sharmanda boʻlsin.
Meni qoʻllab, tasalli bergansan, ey Egam.
74 views03:01