فتحت محل تصنيع منظفات وانا بدرس باعتبار إني دارسها.. برأس مال ٥٠٠٠ جنية بس، المحل كبر و فتحت فرع تاني لأخويا و خلصت دراساتي و خدت درجة أخصائي تحاليل طبية،
حوشت مقدم المعمل و فتحت علي بركة الله
كانت أيام الثورة و يدوبك فتحت ٢٠ يوم و العمارة اتسرقت بما فيهم أنا، لدرجة إني اتمنيت لو كانوا ضربوني بالنار و ريحوني.
قعدت سنتين أسدد في أقساط حاجات اتسرقت مش موجودة أصلا و ألملم نفسي و فتحت في مكان تاني و الحمد لله ربنا كرمني و للأسف أهملت المحل حبتين عشان المعمل أخد وقتي، و فتحت فرع تاني، و ربنا كرمني و جوزت نفسي بنفسي
مستمرش الوضع كتير و ظهر البيزنس بين الدكاترة و المعامل و دة أثر معايا جدا.
في الفترة دي ربنا رزقني بأميرتي الإستثنائية رزان بمرضها النادر
كان اختبار صعب جدا علينا، قفلت المعمل الرئيسي و صفيت المحل و سبت المنطقة كلها، ممكن تقولوا انهزام عشان اللي جرب غير اللي سمع.
هديت حبة و ظهرلي مكان و فتحت لتالت مرة متوكل علي الله.
