2024-05-03 09:40:24
.
إسمعوني ياأبطال:
تعالوا أحجي وياكم وآخذ من وقتكم شوية ياحلوين:
جميع الاسئلة الألكترونية والأسئلة الملونة وأسئلة الأحكام ونماذج الأسئلة اللي نشرتلكمياهه جميعها مراجعة.. وليست مرشحات..
لأن بالإمتحان الوزاري ميصير نعتمد على مرشحات.. ليش؟
لأن كل الكتاب داخل ولازم نقرأ كلشي.
أحيانا (نتوقع توقع)الأشياء المهمة.
يعني هذي أول سنة (بعد الوباء) دخلت المواضيع اللي كانت محذوفة.. ولهذا كلنا نتوقع هذه المواضيع راح ييجي منها بالامتحان.. (تخمين وتوقع فقط) لأن احنه مانعلم الغيب ولا نعرف شراح ييجي.
ولهذا الطالب والتلميذ الدارس كل المواضيع وحافظها يكون مسيطر ومامعتمد على موضوع معين.
والإسلامية ياأبطال بكل سؤال أكو ترك وهذا من صالحكم.
يعني سؤال الأحكام (أحكام لام ال التعريف):
إذا انت تعرف تستخرج الكلمة (الاسم) اللي يبدأ ب (أل التعريف) وتعرف تبين حكمه والسبب هاي ضمنت ١٠ درجات..
واني كاتبتلكم بالقناة بالتفصيل شلون تستخرج الكلمات وشلون تبين الحكم والسبب.
وتحفظ تعريف الإدغام الشمسي والإظهار القمري وتعرف أمثلة عنهم.
وتعرف أنه (أل التعريف) لاتدخل على الأفعال ولا الحروف وإنما تدخل على الأسماء فقط.
وإذا حافظ النصوص القرآنية وضابط الإملاء هاي أنت ضمنت ٢٠ درجة.
ولتخافون : مايحاسبوكم عالرسم القرآني إذا نسيتوه ولا على أرقام الآيات.. عادي إذا تخلون الدائرة فارغة بدون رقم.
وإذا حافظ المعاني هاي ٥ درجات
أما التفسير فإما ييجيكم على شكل سؤال أو ييجيكم (فسر قوله تعالى .....)
إذا سؤال راح تجاوبوه وإذا فسر يعني تشرحون، واني كتلكم إذا تشرحون شلون تبدون؟
تبدون تكولون :
يبين الله سبحانه وتعالى بهذه الاية الكريمة ....... وانوب تبدون تشرحون الآية..
وطبعا أنتم حافظين المعاني راح تستفيدون من المعاني بالشرح، وماخذين فكرة من الكتاب من قريتو الشرح وتكدرون تعَبرون وترتبون الكلمات بحيث تكدرون تاخذون درجة كاملة.
بعد المعاني والشرح عدكم سؤال: (الحديث)
عليه ١٥ درجة
عدكم ٥ احاديث ييجيكم ٢ وتختارون واحد
تكتبون حديث وراح يطلب شي آخر اما أهم مايرشد إليه الحديث، أو سؤال عن الحديث..
بعده سؤال عن العقيدة والعبادات..
والعقيدة مواضيعها :
التقويم الهجري
الإيمان بالرسل والأنبياء
الإسراء والمعراج
أسماء الله الحسنى
أما العبادات فمواضيعها :
(فريضة الحج)
بعدها سؤال السيرة، ومواضيع السيرة هي:
سيرة النبي محمد عليه أفضل الصلاة وأزكى التسليم:
معركة الخندق(الأحزاب)
صلح الحديبية
فتح مكة
معركة خيبر
والنبي يونس (عليه السلام)
والنبي عيسى بن مريم (عليه السلام)
والسيدة خديجة الكبرى (عليها السلام)
وحذيفة بن اليمان الانصاري (رضي الله عنه)
وأيضا فرعين وتختارون واحد.
السؤال السابع هو الآداب.
ومواضيع الآداب هي:
حرمة المسجد والأماكن المقدسة وآدابها..
آفات اللسان
العفو والتسامح
الحياء والحشمة والحجاب
آداب التعامل مع الناس.
وهم راح ييجيكم سؤالين وتجاوبون واحد فقط.
وراح اكوللكم شي ياأبطال:
الإمتحان الوزاري حلو .. وسهل
أسهل من الإمتحان الشهري.
وعندك وقت أكثر من الإمتحان الشهري...
ولازم تصير عندك شخصية قوية ومتخاف وتتوتر لأن اللي يخاف راح يخطأ، بس البطل مايخطأ لأن واثق بنفسه لأن شاطر وبطل ميخاف من إمتحان.
بس أهم شي تضبطون المنبه بليلة الإمتحان.
ومن الليل تحضرون بطاقتكم وقرطاسيتكم تخلون بيهه اكثر من قلم رصاص ومساحة نوعية جيدة..
ومقطاطة هم نوعية جيدة..
ومسطرة صغيرة تكدرون تخلوها بالمحفظة.
وقلم جاف إما ازرق أو أسود، فقط هذي اللونين ميصير غير لون ياحلوين.
والقلم الجاف تكتبون بي فقط معلومات الغلاف :
الاسم والمدرسة والصف والشعبة والرقم الامتحاني والموضوع والدور والسنة..
والرقم الإمتحاني أكتبوه من البطاقة صحيح وبهدوء لا تستعجلون .
ومن تكتبون اسمكم والمعلومات عالغلاف بعدها تتركون القلم الجاف بعد أبد لاتستعملوه لأن ممنوع.
ومن تحلون اقرأوا السؤال للأخير لأن نوبات السؤال بي مطلبين او ثلاثة أو السؤال صاير بنهاية الجملة فلازم تقرون السؤال بتركيز..
(فِهم السؤال نصف الجواب).
ومن تكملون الحل لازم لازم وضروري ولابد تراجعون.
المراجعة مو بس تقرأ حلك وكتابتك.
المراجعة تخلي كدامك ورقة الاسئلة والدفتر وتبدي من أول سؤال تقارن :
يجوز ناسي فرع
يجوز تارك والسؤال مابي ترك
يجوز ماتارك والسؤال بي ترك
يجوز ناسي فرع او سؤال
يجوز تارك سؤال انت ضابطه وحال سؤال مامتأكد منه
يجوز ناسي تعريف او نقطة او فراغ
تحسب المعاني
تحسب التعاريف
تتأكد كلش زين من الاسئلة والحل
تراجع اسمك ورقمك الامتحاني
ولاتستعجل من تشوف صديقك يطلع لأن هذا مستقبلك.
ولاتستعجل من المعلم المراقب يكلك يله استعجل.. لاتهتم، هذا وقتك وعندك وقت مكتوب على ورقة الامتحان كله ملكك اذا واحد يكلك استعجل والوقت مامنتهي هذا يتحاسب.
ولاتعتمد على الرد لأن أكو مراقبين يردون خطأ وتضيع درجتك إذا شاطر وواثق من حلك لاتتردد ولتخاف.
دعائي لكم..
آلاء طه
29.4K viewsedited 06:40
د
