2023-04-02 04:47:14
روایتی از طَواف اِبن عباس
اِبن عباس ئوزی نَقل ایلیوری بوخبری
بو موثَّق خبرین اهل دِیله وار اثری
گجه نون وقتی دیور قصد زیارت ائلدیم
کعبهی حَقّه گئدوب حَقّی عبادت ائلدیم
یاتیشوب یان یانا زَوّار قَرانلوقدی حَرم
حِجر اسماعیله ساری دولانوب گِئتدیم اودَم
سجده حالینده بیرین گوردوم ائدور رازونیاز
اَل آچوب ساحَت قُدسه سوزی پُرسوز و گُداز
دیور ای حِکمتیله کون و مکانی یارادان
خوشدی بویرده اگرگِئتسه حِجابات آرادان
قفس جسمیده آخرده بو جانیم سیخیلار
بیر گونی بو بدنیم بستر موتَه یخیلار
نا امید اوندا مُعالجدن اولار باخسا طبیب
خوفیدن تَر بوریَر کیمدی منه اوندا حبیب
نه آتام وار باشیمون اوسته اِلهی نه آنا
چاره سیزاهل وعیالیم گرک هجریمده یانا
بار اِلها منه رحم ائت اوچتین ساعت ئوزون
اَلی بوش بندهنون اول لحظه که باغلالا گوزون
اونداکه پیکریمی ائل آپارار قَبره طرف
دعوت ایلله هامی بیربیرینی صَبره طرف
کفن و دَفنیم قوتارار مَن لَحد آلتدا یاتارام
قاره تپراقه اوگون جسمیمی آخر قاتارام
قِیدَر قوم و قَبیلم هامی کاشانهسینه
مُهر پایان ورولار عُمریمون افسانهسینه
غُربت قبریده اولماز بیری فریاد رَسیم
یوخدی سندنصورا یارب بیلورم داد رَسیم
بار اِلها اویامان گونده منیم دادیمه چات
گوزیاشیم قیمتینه رَحمووِی یارب منه سات
اِبن عباس دیور سوز منه تَاثیر ائلدی
ذِهنی مَعطوف ئوزونه نالهی شَبگیر ائلدی
دیزیمون اوسته باشین آلدیم اونون رَافَتیلن
تاکه صحبت ائلیم منده بو خوش سیرتیلن
ساتاشوب اوندا گوزوم آی ایشیقیندا یوزونه
سوزوم آغزیمدا قالوب باخدیم اوزیبا گوزونه
گوردوم اول ناله ائدن سیّد سَجّاد ئوزودی
نِهضت کرب و بلانون ایکی آغلار گوزودی
دئدیم ای بَند دلِ حضرت شاه شهدا
سن امام اوغلی امامَه بِله شیون نَه روا
ماخَلَق اِذن حَقیله آلوری سیزدن حَیات
ایکی دنیاده قاپوزدی هامیا باب نَجات
اِئتدی فرمایش اوحضرت مَحَکی سانما بِله
پانبوقا بَنزوری ایمان اونی تاپشورما یِله
تُپراق آلتیندا سوروشمازلا ئولنلَر نَسَبین
یا مقاماتیلَرین یا بیرینون اُمُّ و اَبین
اوردا خیر و شَر اعماله مُحاسب گَله جک
هرکیمون اولسا اگر خیرعملی دینجلَه جک
(نادرا) نامهی اعمالووَه گَر رب جلیل
عدلیله باخسا اولارسان اویامان گونده ذَلیل
#پندیات
متنوعترین متنها و سبکهای ترکی
وفارسی در کانال یاران عاشورا
╭۰━━━۰⊰◇⊱۰━━━۰╮
@YaraneAshoora
╰۰━━━۰⊰◇⊱۰━━━۰╯
329 views01:47