2023-06-13 21:54:33
امّت کو امام مہدی کی ضرورت کیوں ہے ؟ جس اسلام کو اللہ تعالیٰ نے دینِ حق کے طور پر ہمارے لئے پسند فرمایا،اور اس کی اطاعت و نفاذ کا ہمیں مکلف بنایا، وہ اسلام آج بے سر و سامانی کی حالت میں مدارس و مساجد اور چند گھروں تک محدود ہوکر رہ گیا ہے۔ حالانکہ اس دین کے لئے بزبانِ رسالت یہ بات طے کردی گئی تھی کہ یہ غالب رہنے کے لئے آیا ہے مغلوب ہونے کے لئے نہیں۔
الإِسْلَامُ يَعْلُو وَ لَا يُعلیٰ عَلَيْه
خود نبی اکرم صلی اللہ علیہ و سلم نے امت سے وعدہ فرمایا ہے کہ اسلام ہر کچے پکے گھر میں داخل ہوگا۔ یہ وعدہ حضرت امام مہدی اور سیدنا عیسیٰ علیہ السلام کے دور میں پورا ہوگا۔
آخر زمانے میں خلافت کے قیام سے پہلے جبر و ظلم کے نظام کی پیشین گوئی احادیث میں موجود ہے، اور جس کا مشاہدہ ہم اپنی آنکھوں سے کر رہے ہیں۔ حکومتوں، اداروں، اور بالادست طبقے کا ظلم آسمان کو چھو رہا ہے۔ مسلمان اس میں پِس رہے ہیں۔ اور کوئی پرسانِ حال دور تک نہیں ہے۔
ایسے میں ایک ایسے قائد کی ضرورت ہے جو امت کے زخموں پر مرہم رکھے، شام و فلسطین کے مہاجرین ہوں یا برما و بنگلہ دیش کے بے سر و سامان پناہ گزین ہوں۔ کشمیر و ہند کے مظلوم مسلمان ہوں یا ایغور و ترکستانی کلمہ گو ہوں، بلکہ دنیا بھر میں ظلم و ستم کے شکار تمام مسلمان، اپنے وطن میں لادینی طاقتوں کے جبر تلے مقہور اسلام پسند یہ سب ایسے قائد کی راہ تک رہے ہیں جو ان کو ان کا حق دے، ظلم سے نجات دے اور عدل و انصاف کا سایہ فراہم کرے۔ وہ قائد امام مہدی ہیں۔
ایک بہت بڑی مصیبت اختلاف و انتشار کی صورت میں امت کے سامنے ہے۔ مسلکی، مذہبی اختلافات کے طوفان میں حق دھندلا گیا ہے۔ اختلافات کو اتنی ہوا دی گئی ہے کہ عموما یہ ذہن بن چکا ہے کہ اسلام کا کوئی مسئلہ اتفاقی ہے ہی نہیں، بلکہ ہر مسئلے میں اختلاف ہے۔ حالانکہ دین اسلام کے اکثر مسائل اتفاقی ہیں۔ امت اُس دور کی محتاج ہے جس میں کوئی تفرقہ نہیں تھا اور سبھی ”مسلم“ تھے۔ خلافت علی منہاج النبوۃ کا یہ دور ایک بار پھر لوٹنے والا ہے اور اس خلافت کے خلیفہ امام مہدی ہوں گے۔
خلاصہ یہ ہے کہ امام مہدی کی ضرورت صرف مال کی فراوانی کی حد تک نہیں ہے، نہ صرف شریعت کے چند احکام کے نفاذ تک محدود ہے، نہ ہی مقبوضہ علاقوں کی فتح اس کا مقصود اصلی ہے بلکہ دین کو اُس حالت میں غالب و نافذ کرنا مقصود ہے جس حالت میں اسے رسول اللہ صلی اللہ علیہ و سلم چھوڑ کر گئے تھے۔ مسلمانوں کے دنیوں اجتماعی معاملات کا انتظام اور سیاسی نظم کی قرآن و سنت کی روشنی میں قیام بھی امت کی ضرورت ہے اور یہ ضرورت امام مہدی کے ذریعے پوری ہوگی۔
وما ذلك علی الله بعزيز@Qayaamat
125 views18:54