2023-07-03 00:13:33
بمرة كنت عم احضر تدريب اله علاقة بالدعم النفسي وانطرح فيه نشاط صغير ببلش بإنك تاخد ورقة وتكتب فيها مخاوفك بالحياة
وأنا لأنو عندي ارتباط كبير بالمذكرة بجوالي كتبت السطر هاد بالمذكرة "الخوف من البقاء في المساحة التي لا أحب" وبوقتها ما كان ببالي أي مخاوف تانية لان ببساطة كان مفهومي عن السعادة مرتبط بالسفر
وبمرور السنين صارت المذكرة مرجعية الي كل مدة افتحها واكتب فيها شي حاسسته
طبعا هاد الشي منيح كتير وبخلينا نتعرف على حالنا اكتر
بس الي شفتو على مدى سنين انه الإنسان بطبيعة الحال شعوره بالخوف أو الحزن بيطغى على مشاعر الفرح والسرور عنده والمشاعر السلبية بتذكرنا بحالها أكتر بكتير من المشاعر الإيجابية
لهيك قررت اعمل مذكرة تانية اكتب فيها أسباب السعادة الي عندي وتفاجأت انها كتيرة فعلا بس أنا مو شايفتها
ما بعرف اذا في ناس هون عندها مذكرة شبيهة بتكتب فيها أشياء بتخوفها أو مدايقتها بس حبيت اطرح فكرة مذكرة الأمان أو مذكرة السعادة، فيكن تسموها متل ما بتحبوا، بتكتبو فيها أنا سعيد/ة لأنه:
وارجعولها بين الحين والحين لتشوفوا وتتأكدوا انها بفترة قصيرة رح تكون حجمها أكبر بكتير من مذكرة المخاوف بس نحن بحاجة نتذكر شو عنا
47 views21:13