2023-04-23 23:47:41
Ministirri Muummee Itoophiyaa Abiy Ahimad mariin nagaa Waraana Bilisummaa Oromoo (WBO) kan mootummaan ‘ABO Shanee’ jedhee waamu waliin mariin nagaa iftaan Taanzaaniyaatti gaggeeffama jedhan.
Abiy (PhD) kana kan dubbatan sagantaa ‘Waraanni Yaa Dhaabbatu, Nageenya Yaa Waaressinu’ jedhuun qaamolee nagaa buusuu keessatti gumaachan galateeffachuufi beekamtii kennuuf Dilbata Ebla 23, 2023 qophaa’erratti ture.
Dr Abiy itti dabaluun, ''Nageenyii akkasumaan kan dhufu miti, dhama'uu fi gootummaadhaan dhufa,'' jedhaniiru.
Toran dhufaa keessa taateewwan ijoon lama duraafi duubaan kan raawwataman ta'u kan eeran MM Abiy, tokkooffaan pirezidaantoonni naannoolee Maqaleetti imaluun nageenya eegalamee qaamaan mirkaneessuufi tumsa barbaachisu taasisuudha jedhan.
Taatee lammeessoon ammoo, mariin ABO-Shanee waliin taasifamu iftaan Kibxata dhufaa Taanzaaniyaatti eegalama jedhaniiru. ''Kanas ummanni Itoophiyaa cimsee barbaada'' jedhan.
Kanneen marii nagaa kanarratti hirmaatanis guyyaa har'aa [sagantaa ‘Waraanni Yaa Dhaabbatu, Nageenya Yaa Waaressinu’ jedhuun] kana yaadachaa milkaa'ina nageenyaatiif akka hojjatanan gaafaniiru.
“Waggaa lama wal waraanuurra, waggaa 20 mariyachuu wayya,” jechuun karaa nagaa rakkoo furachuuf carraa kennuun barbaachisaa akka ta’e cimsanii dubbatan MM Abiy.
Sagantaa qaamolee waraana Kaaba Itoophiyaatti waggoota lamaaf gaggeeffame dhaabsiuuf gumaachan galateeffachuuf qophaa’e kana irratti Dursaan Komishinii Gamtaa Afrikaa (AU) Muusaa Faakii, karaa Itoophiyaan nagaa buusuufi keessa darbiteefi muuxannoo biyyattiin qabdu rakkoolee Afrikaa furuuf fakkeenya babal’achuu qabudha jechuun murannoo MM Abiy dinqisiifataniiru.
Ministirri Muummee Abiy Ebla 19, 2023 Lixa Oromiyaa, magaalaa Naqqamteetti imalanii uummata godinaalee Wallaggaa waliin wayita mariyatanitti gaaffiiwwan nageenyaafi misoomaa uummanni dhiyeessu dhuguumsuudhaaf nagana barbaachisaadha jedhan.
"Tokkoffaa, namoonni yaanni keessan ykn yaanni jaraa nurraa adda ta'e nagaan galuu danda'u.
Lammaffaa, nagaan galanii tarsiimoosaanii, kaayyoosaanii uummatasaanitti ibsachuu danda'u," jedhan MM Abiy.
Koreen nageenyaa sadarkaa pirezidantii itti-aanaa Paartii Badhaadhinaatiin durfamu hundeeffamuufi hojiin hojjetamaa jiraachuus eeruun, waan jiru mootummaan isaanii akka ifa godhu himanii ture MM Abiy.
MM Abiy haasaa taasisan kanaan qaamooleen biyya ollaa kan taatee Sudaan keessatti wal waraanaa jiran nagaaf dursa akka kennan waamicha taasisaniiru.
Itti dabaluunis Sudaanitti sagantaan nagaa kan fakkaatu akka qophaa'u abdiin qaba kan jedhan MM Abiy, ''hir'ina keenya irraa qamadii kuntaala kuma shantama ummata obbolaa kan ta'an Sudaaniif erguuf jirra'' jedhaniiru.
1.5K views20:47
W
