#التعلق لما تكون سعادتك مرتبطة بشخص .. لما ثقتك في نفسك تكون م | حدوتة مصرية 🌹❤️
#التعلق
لما تكون سعادتك مرتبطة بشخص .. لما ثقتك في نفسك تكون مبنية على الكلمة الحلوة اللي هتسمعها .. لما مزاجك يتقلب لمجرد أن رسالة أو مكالمة اتأخرت من شخص معين .. لما تلاقي مزاجك فجأة في الأرض وفجأة في السما .. لما تحس ان قيمتك مرتبطة بوجود الشخص ده في حياتك .. لما يكون إحساسك بالأمان مرتبط بوجود الشخص ده في حياتك.
اعرف انك متعلق بالشخص ده .. متعلق لأنك دخلت في علاقة حب وأنت مش متزن .. منتظر من الشريك كل حاجة وكأنه المنقذ اللي جاي يحل كل مشاكلك ويدير حياتك ويعمل منك إنسان سعيد وناجح...
دي اسمها علاقة مرضية .. عندك جوع عاطفي واحتياج .. التعلق مش ممكن تبني عليه علاقة ناجحة .. التعلق بيخليك تتصرف تصرفات درامية منفرة سواء كنت راجل أو ست .. بيخليك شخص أوڤر بتزعل لأتفه الأسباب وردود أفعالك عنيفة واكبر من الموقف بكتير ..
لدرجة أنك يوم ما تتعافى من العلاقة دي هتعرف قد ايه كنت مذنب في حق نفسك وفي حق الشخص ده .. هتعرف أن تصرفاتك الإنفعالية دي انت نفسك مش هتتقبلها من شخص تاني لو تبادلت الأدوار.
صحيح منقدرش ننكر أن العلاقة دي فيها مشاعر حلوة لكن الحقيقة أنها مشاعر مؤقتة .. فرحة قصيرة المدى مش ممكن تدوم لأن ملهاش أساس .. علاقة مبنية على "هوا" كلمة تودي العلاقة في ناحية وكلمة تانية ترميها الناحية التانية ..
قبل ما تدخل في علاقة جديدة تأكد انك متزن وراضي بحالك لوحدك وقادر تستمتع بحياتك لوحدك مش منتظر شخص يصلح حالك.
لازم تعرف أن الشخص الوحيد اللي في أيده اصلاحك هو "أنت"
لو اعتمدت على حد يصلح حالك ويسعدك ويديلك الأمان تبقا انت الخسران ..
أولاً هتخسر الشخص ده في اقرب وقت .. ثانياً هتعطل نفسك عن إصلاح ذاتك.
#الوقت أغلى بكتير من انك تضيعه في علاقة فاشلة
#متدخلش حياة حد غير وانت في حالة اكتفاء ورضا داخلي
#متدخلش حياة حد وانت في حالة ضعف أو احتياج
#نهى_أبوطالب
