من دەڵێم : شاری دڵم باغ و گوڵستانە دەچم
عەقڵ ئەڵێ : نا قەسەبەی شۆڕشی مەستانە نەچی
من دەڵێم : نوختەیی ئەو ڕەوزەیی ڕیزوانە دەچم
ئەو دەڵێ : نا ڕەشە جێ ڕاوگەیی شەیتانە نەچی
من دەڵێم : مەسکەن و ئارامگەیی جانانە دەچم
ئەو دەڵێ : سەربەسەری تێکچووە وێرانە نەچی
من دەڵێم : جێگەیی هەر شێت و جنونانە دەچم
ئەو دەڵێ : نا زەدەیی پەنجەیی پەریانەنەچی
من دەڵێم : مەرکەزی ئەسراری حەریفانە دەچم
ئەو دەڵێ : جێ تەماعی چاوی حەسودانە نەچی
من دەڵێم : وەختی خەتەر مەئمەن و قەڵغانە دەچم
ئەو دەڵێ : کون کونە جێگەی سەرەپەیکانە نەچی
لەم هەموو چوون و نەچوونە سەری سوڕما"کامیل"
من دەڵێم : جوانە بچم ئەو دەڵێ وا جوانە نەچی
مامۆستا سەید کامیل ئیمامی(ئاوات)
#سیروان_پرس
@sirwanpress
sirwanpress.ir