مش لازم كل شوية حد يذكرك أن من الحكمة أنك تستغل الوقت والجهد و | نافع | Nafe3
مش لازم كل شوية حد يذكرك أن من الحكمة أنك تستغل الوقت والجهد وتبذل وتضحي بالغالي والنفيس في أوقات ومواسم "الربح"، مش لازم تستنى حد يذكرك بدا!
أنت من نفسك اعقل الأمر دا وافهمه ورسخه في ذهنك: مواسم تحصيل الأرباح مش زي مواسم ركود التجارة..
وكذلك في رمضان، "أيام معدودات" جملة شارحة نفسها بنفسها: يعني مش لازم تاكل أفضل أكل وتحصل أحسن ملذات وأفضل أنواع الراحة والأنتخة، لأنك في رمضان غير برا رمضان..
سمعنا كتير عن شعارات تحبيب الناس في العبودية: زي رمضان شهر التغيير وشهر الثورة على النفس وتغيير العادات والسلوكيات و و و، والنتيجة: الناس لسه محلك سر (علشان محدش عايز يدفع التكلفة)
من الآخر وباختصار: إن لم يكن رمضان شهر المجاهدة والألم والترك والتضحية وقبول الواقع والوعي بنفاسته وإدراك ثمنه الغالي، إن لم يكن رمضان بالنسبة لك بهذه النفسية: فأنت في رمضان مثل خارج رمضان!
افهم الثمن واقبله: لازم تتعب، لازم تبذل، لازم تجاهد نفسك، لازم تضحي، لازم تسهر كتير في الصلاة وقراءة القرآن وتقلل نومك، لازم تحس بالإرهاق والتعب الشديد في العبادة، لازم تـ "شد مئزرك" وتجتهد بصدق!
دع عنك الشعارات والمحفزات: قدم الصدق، قدم الثبات، اقبل التضحيات، عساه أن يعفو عنك ويغفر لك! (وَلَوْ أَرَادُوا الْخُرُوجَ لَأَعَدُّوا لَهُ عُدَّةً): فين العُدة؟ أنت أكثر الناس معرفة بهذه الإجابة!
