2024-05-13 18:37:16
ҚАРАҚАЛПАҚ ЕЛИМЕ
Тәрийп берсем мен туўылған жериме,
Миллетимниң арын бууып белиме,
Бундай жерди басқа жерде көрмейсен,
Кел мийманым Қарақалпақ елиме.
Ақ көкирек ангөдеклеу халқы бар,
Журт сыйлаған миллий дәстур, салты бар,
Тойларына, әдетине қарасаң,
Басқа еллер кылғанынан парқы бар.
Қарақалпақ, саҳра елим, шәменим,
Зағара нан, палаў, гүртик жегеним,
Бизлер салған имаратқа тең келмес,
Дубайдағы Бурж халифа дегениң.
Ҳауасы зор озгериушең райлы,
Сууын ишсең, ишкен сайын унайды,
АКШ дағы Вашингтонның алдында,
Пахта өскен атызларым шырайлы.
Ыссы қуяш топырақты қуўырган,
Сол топырақта излерим бар жуўырған,
Назлымхан сулыўдай естелигимниң,
Қай жери кем сен мақтаған Луврдан?
Атызында шекер қаўын теңкейген,
Суў бойында мәжнүнталы еңкейген,
Уллы Қытай дийўалының орнына,
Шылпығымды жәннетлерге тең деймен.
Келген қо,нақ сирә таслап кеталмас
Шырайына бийпәруалық еталмас,
Тастың кәни Қаратаўым бойына,
Париждеги Эйфелиң де жеталмас.
Аўылымда алдын қонақ болдың ба?
Пешахана сыпасында кондың ба?
Қызарып гүллеген жынғыл даламды,
Алмаспайман Англия Лондонға.
Тарийхы бар түп өтмиштен сазалы,
Ҳақ нийети сап булақтай тазалы,
Шет елдеги жеген гамбургериңнен,
Мениң ыссы шөрек наным мазалы.
Гаваийде алған демиң дем емес,
Ашшы көлим Гаваийден кем емес,
Карекеңе пайтахт болған Нөкиске,
Ҳәтте сениң Токиоң да тең емес.
Қалың өскен көк қамыста жатып көр,
Жалаң аяқ орпаңларға батып көр,
Бир жақтағы ананасты мақтамай,
Карекеңниң гүрбегин бир татып көр.
Сырт елдеги аспазлардың алығын,
Мақтап тағамларын палға малыдың,
Алып кел соларды лал қалдырайын,
Бир жеп көрсин Қаратерең балығын.
Керек сөзим таппай йошым қыстаған,
Бирақ көкке теңеуге де устаман,
Цицилия атаўлары қасында,
Шырайлырақ Бөриш таўым, Қусханам.
Көргенге ерксиз таңлай қақтырар,
Ултанынан санмың байлық атқылар,
Кең жазықлы арқадағы Үстиртим,
Қушағында кийиклерим шапқылар.
Халқым даласында жәўлан урғаны,
Ырысқыдан толар үлкен қырманы,
Мен таныйман Ҳиндистанға ушса да,
Аралыма қонып өткен тырнаны.
Чарли Чаплинди көп тилге алыпты,
Қылық пенен күлдирген ол халықты,
Бизлерде Өмирбек лаққы жасаған,
Ҳәзилдиң бәрлығы соннан қалыпты.
Сизлер жақта алымлар көп деседи,
Дәрилери хәмме дәртти кеседи,
Сол дәриниң ең тийкаргы гиясы,
Боян тамыр мен тәрепте өседи.
Жақсы деме Шекспирдиң жырларын,
Үйрен деме операның сырларын,
Сен оларды мақтағанды койып тур,
Бир тыңлап көр Демберместиң ырғағын.
Пәнт жемейсең болсаң бизге аўыллас,
Ағам деймиз, иним деймиз баўырлас,
Буныңдай жанкүйер, миймандос халық,
Сениң Мадрит, Берлиниңнен таўылмас.
Елим жасар гүл жайнаған дәўирде,
Адамлары хош жағады кеўилге,
Көрки сулыў болған аўыл-қаламды,
Бералмайман Пекиниңе, Сеулге.
Айтаберсем тәрийплерим таўсылмас,
Кел мийманым кеўилиңниң маўқын бас,
Қарақалпақ деп айтады бизлерди,
Мийман ушын ҳасла есик қаўсырмас.
Жангелдиев Ниетулла (ойшыл).
07.03.2019 ж
Каналымызға ағза болыўды умытпаң!
https://t.me/ibratli_sozler
https://t.me/ibratli_sozler
6.4K views15:37
И
