2024-03-12 02:49:50
عمر و علي (اخوة)
علي الاخ الاكبر (26) سنة
عمر الاخ الاصغر (21) سنة
المهنة : محل مال ملابس (رجالية)
فترة طويلة يشتغلون سوه ( بس الحمل الاكثر على الاخ الاكبر علاوي)
عموري جان بارد ومخلي اغلب العمل على علاوي ( من باب اخوي الجبير)
هذا المحل سبب بعيشة البيت بالكامل
عموري جان بارد وي الدنيا وعايش فقط يومه ويدور بحلقة دائرية وما مفكر يطور ويواجه الدنيا ويصير شي اكبر وشي مهم
يوم من الايام عموري كالعادة متأخر بالنوم بالبيت وعلاوي بالشغل كالعادة
الووو عموري وين انت؟
بالبيت ، تعال للمستشفى علاوي سوه حادث والله اخذ امانته ( توفى)
انتهت الفاتحة ( مر اسبوع)
عموري ب7 الصبح بالمحل (جان لل12 الظهر يلا يروح للمحل ومعتمد على علاوي الله يرحمة)
عموري صار يرجع ب9 باليل( جان العصر يشرد ويرجع للبيت)
عموري صار يروح بنفسه يسوك من غير دولة ( جان علاوي الله يرحمة يسوك وعموري نايم)
عموري بفترة بسيطة اشتره بيت ل اهلة
عموري بفترة بسيطة رجع فرح اهلة
عموري بفترة بسيطة صار رجال يعتمد عليه
عموري تغيرت ملامح وجهة من ملاح طفولية ( كسول و ما يكدر) الى رجال اهلة يفتخرون بي وكدر يعالج جرح علاوي ويكون سبب برجوع الضحكة على اهلة والكل يحسب الى حساب
تعرف شنو السبب؟
عموري جان محتاج صدمة ، عموري جان محتاج تحدي من الحياة ، جان محتاج هجوم من الحياة ، جان محتاج يصحى ، جان محتاج حزن وانكسار وانفجار وضعف حتى يكوم بقوة ويسحك الكل ويواجهة الكل وبالاخص (الحياة)
التربية (الوزاري) هاجمك وتحداك
كالك الامتحانات قربتها الك ، شراح تسوي؟
اكيد راح تضعف
اكيد راح تتحطم
اكيد راح تخصلها بجي ونوح
اكيد راح تخلصها تفتر بالكروبات وتضيع الوقت بالحملات والاخبار الجذب وياهو الي يجي يضحك عليك ويدور تفاعل براسك
اكيد راح تبقى تدور اشياء تافها (مراجعات ، مرشحات ، تأجيل ، اعادة ، اي معدل ...الخ)
اكيد راح تنتهي وتنسحب مو؟ مو؟ موووو
ولك صير نفس عموري وانتفض وكوم على حيلك وغير وجهة نظر الكل وتحدى الكل وصير شخص الى اسمه واحترامه وسبب بفرحة اهلك وناااااااس متأملة بيك كل الخير
ولك صير نفس عموري وخلي الوزاري والدنيا تدنك راسها الك وتتندم على الوقت الي فكرت تهاجمك وتتحداك بي وتعيل بيك
ولك صير عموري وغير ملامح وجهك من ( ضعيف وكسول وبارد وخايف ومتردد)
الى ملامح الكل يحسب الي حساب
وقت اكوو وكلش هواي (قسمًا بالعظيم)
بس يحتاج نهضة منك ويحتاج نظام وجدول وتخطيط وتعوف كل شخص سلبي بحياتك وكلشي سلبي بحياتك خلال هل سنة ( ناس ، اساتذة، كروبات ، اصدقاء ، قنوات ، اخبار ، قيل وقال...الخ) كلشي سلبي حتلو اهلك بهل فترة
اي ابجي وطيح وثاني كوم ارجع اشتغل وقاتل وبالنهاية راح تكعد وانت عيونك تلمع من الفرحة ودكول اخ شكد افتخر بنفسي على الي سويته (بفترة بسيطة وبفترة الكل ضدي ، بفترة الاجواء كلها غلط، بفترة وصلت لمرحلة انسحب من كلشي .. الخ)
انتظرك بنهاية الطريق عموري حبيبي
هااا نسيت ، رمضان الخير عليكم
وبيك حظ خلي العيد عيدين بالنهاية
41.5K viewsedited 23:49
أ
