2023-04-19 13:04:17
Տղամարդու դավաճան տեսակ ՉԿԱ։
⠀
Դավաճանելը ոչ թե բնավորության գիծ է, այլ ընտրություն։
⠀
Առհասարակ, ցանկացած դավաճանություն՝ անկախ նրանից սեռական ակտ է, թե պարզապես նամակագրություն, կարիքի բավարարում է։ Մարդիկ ունենում են որոշակի կարիքներ, ու երբ էդ կարիքները չեն բավարարվում հարաբերություններում, սկսում են փնտրել այլ տեղ։
⠀
Մոռանում են, որ ունեն լեզու, խոսք, հաղորդակցվելու հնարավորություն։ Հասուն անձնավորությունը, որևէ կարիք/սպասելիք/ցանկություն ունենալու դեպքում, խոսում է այդ մասին, քննարկում կողակցի հետ, ելք գտնում։ Ելք չլինելու կամ լուծման եղանակների չաշխատելու դեպքում՝ բաժանվում է, գնում էնտեղ, որտեղ իր կարիքները կբավարարվեն։
⠀
Ոչ հասուն էակը, հակառակը, չի արտահայտվում, չի փորձում տարանջատել իր կարիքները, չի զրուցում, պարզապես մեղադրում է դիմացինին, ու, իրեն զոհի տեղ դնելով, դավաճանում։
⠀
Տղամարդիկ դավաճանում են, որովհետև իրենց շուրջ բոլորն ասում են՝ իսկական տղամարդը պիտի դավաճանի։ Տղամարդիկ դավաճանում են, որովհետև չեն ուզում ընկերներից հետ մնալ։ Տղամարդիկ դավաճանում են, որովհետև երբեմն իրենց սեռական կարիքներն ավելի շատ են լինում։ Տղամարդիկ դավաճանում են, որովհետև ինչ-որ պահի իրենց կնոջ հոգնած տեսքը, ոչ տոնական հագուկապը, անընդհատ երեխայի հետ լինելը վանում է։ Տղամարդիկ դավաճանում են ԼԻՔԸ պատճառներով,
⠀
ԲԱՅՑ
⠀
էս ու մյուս բոլոր դեպքերում դավաճանության ՄԻԱԿ պատասխանատուն դավաճանողն է, ոչ թե հասարակությունը, ընկերները, կինը, երեխան, հոգսերը…
⠀
Եթե հասուն տղամարդը չի կարողանում ֆիլտրել հասարակության հիմար արժեքները, չունի սեփական կարծիք՝ ընկերների արարքները չկրկնելու համար, վախենում է խոսել իր ցանկություններից ու կարիքներից, ուրեմն դեռ հարաբերությունների ժամանակը ՉԷ։ Ուրեմն դեռ հասուն ՉԷ։ Էդքան բան։ Նախ պիտի որպես անհատ կայանաս, նոր հարաբերություններ ստեղծես։
⠀
Հերիք է մեղադրեք բոլորին՝ բացի գործողությունն անողից։ Հերիք է կանանց մաստեր կլաս տաք՝ չդավաճանվելու համար։ Հերիք է դավաճանությունն արական սեռի բնավորության գիծ դարձնեք։ Հերիք է ցանկացած արարք ՍԵՐ ասվածի տակ քողարկեք։
⠀
Սովորեք ու սովորեցրեք ձեր երեխաներին ԶԳԱԼ կարիքները, արտահայտվել, հաղորդակցվել, ԼՈՒԾԵԼ ԽՆԴԻՐՆԵՐԸ, այլ ոչ անտեսել դրանք։
⠀
ՀԳ. Սա երկու սեռի մասին է։ Կանայք ևս դավաճանում են։
4.7K views10:04