( قسمت سوم ) داستان 'زری خانوم' رسول بَشّو دَه و دار و ندار | داریون
( قسمت سوم )
داستان "زری خانوم"
رسول بَشّو دَه و دار و نداری ی بهروت و بَ یازَّ و بشّو . مثل نن ک بَ خوزستان در رعییتی یَ شکا . چند سال نی یَ بمند و سالَ ۱۳۷۸ همون نی یَ بمارد بالاخرا هاررو اِ نفر بَ زاهرا شِخوس یَ رو خالو اَشی اِتَمّیندَ بیشی اِخوس . یَ رو چند بی داده اشی بیشی اِخوس . و زاهرا رو ب رو زارد تر وودَ و تلّی جی گردتر زنَ هارچی معجون بُ بیشی ازونا و هیشی ادا بخره ک بالکم واچای برکِه . ولی زاهرا هار رو تلّی گردتر ابو ی رو دوبارا بَ کیاوشی سرو صدا م بنو . بون واشتان . دییم زاهرا دم باغچا ار اَیه و استفراغ اکره . واتی مامه جگرام بَسّوت داران اسوجان بدَنام بَ دارد اسوجه بخدا نن دوا ب سیخ سور وکارده عباس وادترا . ایشکی کیاوشی نبو سلطونه و دَ وُ زاهرا از بشتان ور مالا نباتی بیموات زاهرا داره امره .مالا واتی ابی چورا ؟ بیموات نزونان بیبی بمّیَ دم بون و واتی سلطون چکاری بی اکره واتی پیرزن یهودی یَ داورا گاردَ اِ دوا اِی هیدایا اُن واتی اگر بخره واچای بر اکه . از جی دوام بَ خاردای دُ ها حالی بَ گل یا ار امّیا بیبی مالا واتی زنه . نن واچا الّن هافت ما شا اگر قرار ب برکه هی نن همو کتاک و دوا و دعا برکاتا ابُ بیبی مالا بَ را پِلّا و بشت روی حیاط از جی پسر وی بشتان زاهرا خله زارد و ماردنی و دَ و تلّی جی خله گُرد بودا بُ از پالو وَی هاچاشتن . بیبی مالا واتی دوا هادَ بینان سلطون اِ تیکا دوای مالا دا و واتی نونَ پیرزنه یهودی یَ شوات نن دوا بَساوی یَ سَ رّو پَ یا و هی او گل یا کری یَ و هی دی یَ . ولی واقته دوام هی دُ حالی وَی بَبُ بیبی واتی نن دوا آدم اکشه . زو اکاره بَکری یَ ک استفراغ کره . انگشتَی و گل زاهرا کارد و استفراغی کا . بیبی واتی سلطون بور بی شونیمن دکتر سلطون واتی اگر بیشونیمن دکتر خون را اکه . عباس همه می بکشه مالا واتی حسین تو زاهرا یِوسّه ؟ بیموات خله واتی بور بش بر گارموا شیر هاگه بورَ از بوز بوز بشتان بر گارمووا بَ زن اوسام بیوات شیر داره ؟ واتی ارو گامی کم شیری دا . اون واچه آ ، بیموات توزم بَ خدا هارچی شیر داره من دَ . زاهرا داره امره . زن اوسا واتی بیچاره دتِ ظارفی پر وکا و از جی سَ قروشام هی دا و بارق واری بواشتان ورَ کیا اون رو فقط گارموونَ شیر شی اِدا . یا اودی شیر گیر نتَمّا . بیبی بَ زور شیری در گل زاهرا کا . زاهرا بنای کا بَ زارد آو بالا آردن . بیبی چند پاسّو نن کاری بکا . زاهرا وحال حیاط در والّایَ . پاچا تمونَی بالاش تا بُ . تمام داور ساقَ پای یا سیخ کباب بُ . بیبی واتی چورا نن همو پا اَد بسّوتّه؟ واتی هارو عباس ب زور در هر زمین شکشّه و دا شکره کُ نوم طرف بواجه . نِنه و پی یَره جی کُ نومَ ایشکی نواجه بیبی واتی ننَ واچا نن همو اذیت مکری یَ چه معلوما کُ اصلا واچای بَ تِل در بو ؟ شما یَرا جی ننَ یی دکتر نشویِ هافت ما آ کُ بیشخوسی یَ سلطون واتی اگر بیشونیمن دکتر رسول و خالو اشی بشکشندَ بیبی واتی غلط اکرندَ . از بِشان دکتر بتّونان بیبی مالا سری ی دیم تل زاهرا نا . اوردا بَ دیم تل وَی معاینای کاردَ ب من شوات حسین تو پا بَ بش بَر . از بشتان بالون در وشتایان . بیبی واتی سلطون بخدا قسم نن واچا نا . اگر جی هاسی بماردا بورَ هاتن ک اتن ناسی بیشونیمن دکتر . ایند بُ کُ داده شی علیرضا ۱۲ سالا غیرتی ببُ و وَ کالای باس ک ننَ یی اگه بشونی یَ دکتر ؟ از تِلّی بدرنان . بیبی واتی بَش تو ابی نشگه غلط زیادی بکره . علیرضا برواشت واتی الّن بشان عباس بتّونان بالاخرا اتن زاهرای دکتر نشویَ . دومّا بویاشت . سر و صدا کمتر وودا بُ عباس زاهرای در هر زمین کارده و دَ و بیشخوس یَ رو دم شوم سلطون وَ جیغای باس ک واچام بماردَ . زنَ بواشتندَ .مایمی واتی نن واچاش بکشتَ . زن همسیا بشتند هر زمین . از جی بشتان زاهرا ب هر زمین در والّایَ . لاغر و ماردنی و هی اِ تل گرد عباس بمّا و و کالای باس کُ چورا کَ هامایی شلوغ کاردا . زاهرا بمارد ک بماردَ . یرادر بیبی زینب مامجه زاهرا براسّایَ . پیرزن هشتاد ساله زبر و زرنگَ محکم در کارّ عباسی باس . واتی مِرَ و معنَ از چهار ما پش بیمواتی یَ واچا بَ تل زاهرا در نا . بیشونی یَ دکتر شما مردَ احماق و حسود پییر بسوتّه اَ نن واچایی دکتر نشویِ و هاررو بیشخوسی یَ بیبی زینب واتی نن چه واچه اِ آ کُ یَ سالا همون نزنگایا ؟ تو لنددهور هی نون خالو حرملایی نهارزی یَ نن واچا بشونندَ دکتر ؟ کم کم بر شی دا کُ زاهرا بمارده . مردَ همسیاجی بمّیندَ هر زمین بیبی زینب چادری ی بَ کمر ارپت و واتی مردَ جلو نمَ کالاّ خرَ بگرندَ نن واچا بشونیمن مریضخونا بیبی زینب بَ احمد آقا همسیا شوات مامه تو بشَ پاسوون بون . عباس بمّا بهنگاره ک معصومه زن قاسم هی لنگا کافش در مخی ی باس واتی تو آبی خافا بَبَ. ماردیشور نن رختُد ببره
